මියුසියම් එකේ මියුසික්

මේකත් ඉතින් පොඩි කාලේ වෙච්ච දෙයක් , එතකොට මං හෝඩියේ පන්තියේ විතර ඇති , කොහොම හරි ඉතින් එක නිවාඩුවකට ගෙදර කට්ටිය අගනුවර සිරි නරබන වැඩ සටහනක් දා ගත්ත , දන්නවනේ ඉතින් , සත්තු වත්තයි , ගෝල්ෆේස් එකයි එතකොට මියුසියම් එක...
( කටු ගෙදර ) ඔය ටිකනේ බලන්න යන්නේ...

මේක ඉතින් මියුසියම් එකේ නම හින්දා වෙච්ච හිනායන වැඩක් , දැන් ඉතින් ගෙදර අය කතා වෙන අතරේ මට ඇහෙනවා මියුසියම් එකක් බලන්න යන කතාවක් , කො ඉතින් ඔය නම මම කලින් අහල තිබුනේ නැනේ....කොහොම හරි මගේ පුංචි මොලේට එක පාරටම අවේ මියුසික් (සංගීතය) කියන තේරුම මොකද දෙකේම ශබ්ද උච්චාරණය එක වගේනේ...

අනික පොඩිකාලේ ඔය හැම වචනයකම තේරුම් දන්නේ නැනේ , දැන් ඉතින් මගේ හිතේ මියුසියම් එක බලන්න ගියාම එකේ පියානෝ වාදකයින් , වයලින් වාදකයින් , ගිටාර් වාදකයින් එතකොට තව ලස්සන සංගීතය එහෙම ඇති කියලා....

ඔන්න ඉතින් දැන් ගමනට පිටත් වුනා , කොහොමහරි ඉතින් දැන් මියුසියම් එකටත් ලං උනා , දැන් ඉත්න් මම හරි ආසාවෙන් මියුසියම් එකේ පඩිපෙළ නැගලා ඇතුලට ගියේ අර ලස්සන සංගීතයයි , සංගීත භාණ්ඩ වාදකයිනුයි දකින්න හිතා ගෙන , කෝ පරණ වීදුරු පෙට්ටියි, පිළිමයි , කාගේදෝ පරණ පුටුවකුයි තව පරන දේවල් ගොඩයි , දැන් ඉතින් මට මාර අප්සෙට් මෙලොදෙයක් හිතා ගන්ටබැ...

කොහොමහරි ඉතින් ඔක්කොම බලලා එලියට ආවම මම අම්මා ගේ අතින් ඇදල ඇහුව....
" කෝ අම්මේ මේ ම්යුසියම් එකේ මියුසික් මුකුත් තිබුනේ නැනේ කියල....? " 
අම්මට මුලින් එක තේරුනේ නැ , ටික වෙලාවකට පස්සේ ඉතින් ඔක්කොම බඩවල් අල්ලාගෙන හිනාවෙන්න ගත්තා.....කොහොම හරි අදටත් ගෙදර කට්ටිය ඕක මතක් කර කර හිනා වෙනවා , මොනවා කරන්නද ඉතින්...

සුද්දට තේරුන ලංකාවේ චන්ද කිරිල්ල

ඔන්න ඉතින් මේක පත්තරයක තිබ්බ කතාවක් , මොනවා උනත් අපේ අයට ටිකක් හිතන්න දෙයක් තියෙන හින්දා මේක දින පොතේ ලියන්න හිතුවා,

ඔය ගොල්ලන්ට මතක ඇති නේ පහුගිය ටිකේම අපේ රටේ චන්ද පෝලිමට තිබ්බා කොහොම හරි ඔය එක ලොකු චන්දයක් වෙලාවේ .සුද්දෙක් ඒ කියන්නේ සංචාරකයෙක් ලංකාවට ඇවිල්ල තියෙනවා ,

මිනිහ කොහොම හරි ටුවරිස් ගයිඩ් කෙනෙකුත් අරගෙන නුවර යන්න පිටත් වුනාලු දැන් ඉතින් කටුනායකින් එලියට ආපු ගමන්ම පෙන්නේ පාර පුරා තියෙන පෝස්ටර් ලු .සුද්දට මේක මාර ප්‍රශ්නයක් ලු මිනිහ කොහොම හරි අර ගයිඩ් ගෙන් ඇහුවලු ,මේ අර පාර පුරා මිනිහෙක් ගේ මුණ දාලා පෝස්ටරයක් ගහල තියෙන්නේ ඔගොල්ලන් ගේ රටේ පොලිසියට ඕන කරන ලොකු අපරාද කාරයෙක්වත් හොයනවද කියලා ,

ගයිඩ් ට දැන් මාර අප්සෙට් ලු මිනිහ කිවුවලු නැ නැ මේ අපේ රටේ ලගදි චන්දයක් තියෙනවා කියලා , කොහොම හරි අර ගයිඩ් සුද්දට ලංකාවේ චන්ද ක්‍රමය ගැන හොදට කියල දුන්නලු සුද්දාටත් මේක අහල දැන් ටිකක් විතර අප්සෙට් ලු . කොහොම හරි සුද්දත් නුවර යනකම්ම මග දිගට ඉටිකොළ සැරසිලි , යෝද කටවුටි එක්ක ලංකාවේ චන්ද කිරිල්ල ගැන හොදට බල බල ගියාලු. ඉතින් නුවර ගියාට පස්සේ සුද්ද අර ගයිඩ් ගෙන් ඇහුවලු ,

" අපේ රටේ මේ වගේ ලස්සන පරිසරයක් නැති හින්දා අපි මේ වගේ සුන්දර රටවල් වලට එනවා , ඒ වගේ ලස්සන මේ රට මෙහෙම විනාස කරන මිනිස්සුන්ට මෙ රටේ මිනිස්සු චන්දෙ දෙනවද කියල "

මේක අහල ඉතින් අපේ ගයිඩ් ට වස ලැජ්ජාවේ බෑ ලු . මොනවා කරන්නද . ඔය සුද්දට තේරුණා ටික අපේ මිනිස්සුන්ට තේරෙනව නම් මේ රට මීට වඩා හොදතැනක තියෙයි නේ ද ?

( තේරුනේ නැත්තම් ඉතින් ලංකාවට දෙවිපිහිටයි ඔහොම යන් ඉතින් )

අලුත් ආදරය

ඔන්න ඉතින් මගේ යාළුවා අද එයා අලුතෙන් ආදරය කරන්නපටන්ගත්ත එක්කෙනා එක්ක බෙල්ලන්විල පන්සල් ගිහිල්ල....

දැන් මිනිහ ඉන්නේ ෆුල් හැපි එකේ . එහෙ යනවා මෙහෙ යනවා හරි සතුටින් ඉන්නේ මොකද පරණ ආදරය වගේ මේකේ දුක් , හිත් බිදීම් නැනේ....මොකද මිනිහ අලුතින් ආදරය කරන්න ගත්තෙ බයික් එකකට නේ ( මිනිහ අලුතින් බයික් එකක් ගත්ත නේ ) කොහොම උනත් වෙනදේවල් බලනකොට බයික් එකකට ආදරය කරන එක හොදයි කියල හිතෙනවා ( දන්නවනේ පලවෙනි ආදරය බිද වැටුනට පස්සේ ඉතින් ) අද කලේ සැබෑවටම ආදරය කරන එක හරිම අමාරු වැඩක්නේ .............

කොහොම හරි කමක් නෑ මම නම් හිතන්නේ ඒ වගේ බයික් එකකට ආදරය කරන එක හරි ලේසි සහ හිත නොබිදෙන වැඩක් කියල. එක් කෙනාටනේ හිතන්න පුළුවන්, ආදරය කරන්න පුළුවන්, අනික් එක්කෙනාට තියෙන්නේ ආදරය ලබන්න විතරනේ.....

කොහොම හරි කමක් නෑ ,මිනිහ මේ ටිකේ පරණ දේවල් ටිකක් අමතක කරලා , අලුත් බයික් එකත් එක්ක ෆුල් හැපි එකේ ඉන්නේ ( ඔන්න ඉතින් දෙන්න දෙන්න ඉන්න අය මාත් එක්ක තරහ වෙන්න එපා මේක එක කතාවක් විතරයි නේ )

ඉස්කොලෙට මී පාසානම් බෙදපු හැටි

 ඔන්න ඉතින් මේක ඉස්කෝලේ යන පුංචි සන්දියේ කරපුවැඩක්....

එතකොට මම 4 වසරේ ගමේ ඉස්කෝලෙට තමයි ගියේ. ඉස්කොලෙ ගියාට මගෙනම් පොතට වැඩි ඇල්මක් නම් තිබුනෙ නැ, එ කිව්වට පොඩි ඇල්මක් වත් තිබුනෙ නැ, කොහොම හරි මට ඔනකලෙ මෙ නිල් අහස යට නිදහසෙ ඇවිදල ගස් වැල් සත්තු එක්ක ජීවත් වෙලා දෙවල් සැබෑවටම දැකල ඉගෙන ගන්න, පන්ති කාමරයේ හිරවෙලා පොත් කටපාඩම් කරකර විභග ලියන එක මටනම් කොහෙත් ම සබැ අධ්‍යාපන ය කියල පෙනුනේ නැ.....( කෝ අපි ඕක ගැන වෙන දවසක කතා කරමුකෝ )

ඔන්න ඉතින් දවසක් උදේ ඉස්කෝලේ යන්න ලෑස්ති වෙලා එලියට එනකොට ගෙදර කල්ඉකුත් වෙලා විසිකරලා තිබුන බෙහෙත් පෙති වගයක් දැකල එකත් සාක්කුවේ දාගෙන ඉස්කෝලේ යන්න පිටත් උනා . දන්නවනේ ඒ කාලේ ඉතින් කලිසම් සාක්කු වල යකඩ කෑලියි , ලී පතුරුයි , මගදිගට හම්බ වෙන ගස්වල කොලයි මලුයි , ජිල් බෝලයි හැම දෙයකින්ම පිරිලා තියෙනවනේ. 

කොහොම හරි ඔය බෙහෙත් පෙති ටිකත් අරගෙන ඉස්කෝලේ ගියාට පස්සේ ඒ වා මීපාසනම් වර්ගයක් ලෙසත් එය දරුණු වර්ගයේ වසක් බවත් මී උවදුර නිසැක විසදුම ලෙස, මහත් වූ අබිමානයෙන් යුතුව හදුන්වා දෙන ලදී....ඉන්පසු මාත් මගේ මිතුරත් රෝස පැහැති සහ සුදු පැහැති පෙති සිසුන් හට නිර්ලොබිව බෙදා හරිනලදී. එ දින පුරාම පන්තියේ කතා බහ උයේ මේ නව මීපාසනම් වර්ගයෙන් මියන වදකරණ හැටිය.....

කෙසේ හෝ පසුදින උදැසන පාසල් යන විටත්, කවුදෝ, සිසුවකු පන්තියටම වස බෙදාහැර ඇතිබවත්, එම වස ලබා ගත සිසුන්ගේ දෙමාපියන් ගෙන් විදුහල් පති ගේ කාමරයේ පිරිතිබිනි, පසුව විදුහල්පති ගේ කැදවීමකට අනුව එම කාමරයට මාද මගේ භාර කරුවන්ද කැදවන ලදී. ඉන් පසු අවවාද , උපදෙස් , තරවටු කිරීම් මැද සතියක පමණ කාලයක් ගත කිරීමට සිදුවිය ...

වැස්ස අවුව සහ අපි

මහවැසි දින ගනන් , සති ගනන්
ගංවතුර හැමතැනම

ජල කදට සාප කර හිරු කිරණ

සොයන මිනිසුන් .............

හිරු කිරණ දින ගනන් , සති ගනන්

නියගයට අත වනන

ඒ හිරුට සාප කොට පැන් පොදක්

සොයන මිනිසුන්.............

දින පොතක ආරම්භය..

 

මමත් ඉතින් ඔය ඉස්සර කරපු කියපු දේවල් දැන් දැන් මගතොට සිද්ද වෙන දේවල් එතකොට හිතට එන එක එක දේවල් , පොඩි දින පොතක ලියන්න තීරණය කළා. අනුන් ගේ දින පොත් කියවන එක නරක වැඩක් නම් තමයි , ඒ උනාට ඒ හොරෙන් කියවන එකනේ , මේක බය නැතුව ඔයාලට කියවන්න පුළුවන් .

මම හිතන්නේ මේකේ පිටු හැම විදියකින්ම පිරෙය් කියල ආදරය , විරහව . දේශපාලනය , ආර්ථිකය ,මිතුදම , විහිළු , අපි ගැන මම ගැන ඔයාල ගැන තව හැම දෙයක් ගැනම . ඉතින් මේක කියවන ඔයාල මේකෙන් ජීවිතයට මොනවා හරි දෙයක් එකතු කර ගනී කියල මම හිතනවා ....... 
මගේ දිනපොතේ පිටු අද ඉදල ඔය ගොල්ලන්ට පෙරලන්න පුළුවන් ......... (හැබැයි බාල්දි නම් පෙරලන්න එපා)