King Country University

 

ඔන්න ඉතින් අපේ තරු කැම්පස් එකට තේරිලා නායකත්ව පුහුණුවත් සාර්ථකව ඉවරකරලා ඉන්නේ. පහුගිය දවසක් තරු මාත් එක්ක මුහුණු පොතේ පොඩි කතා බහකට එකතු උනා

මම : කොහොමද තරු කැම්පස් එක , දැන් පටන් ගත්තද ? 

තරූ : අපෝ අයිය කතා කරන්න එපා, රජරට කැම්පස් එකට තමා යන්න තියෙන්නේ, එපා වෙනවා 

මම  : ඒ මොකද තරු  ඒ එක හොද කැම්පස් එකක් නේ?

තරූ : ඕකනේ අයිය දන්න තරම තමා, මම ගිය සතියේ එහෙ ගියා.( ලියාපදිංචි වීම සදහා ) අවුව ට පිච්චෙනවා පහසුකම්  හරියට නැ

මම :  ඔන්න තරු දන්න තරම ඕක ජාතියන්තර පිළිගැනීමක් තියන විශ්වවිද්‍යාලයක්, එතකොට එහෙ අවුව වැඩිනම් සන් ක්‍රීම් එකක් අරන් යන්න 

තරූ : ඒ කොහොමද ඒ අයියේ. ඒ කැම්පස් එකේ නම වත් මිනිස්සු හරියට දන්නෙත් නැ.

මම : ඔන්න එහෙනම් අහගන්න තරු, ජාතියන්තරයේ භාෂාව English , දැන් ඔයාගේ කැම්පස් එකේ නම කොහොමද English වලින් කියන්නේ රජ = king  රට=Country  එතකොට ඔයා යන්නේ 

king country university 

එතකොට ඕකෙන් ඔයා උපාදියක් අරන් පිට රට ගියාම එහෙ මිනිස්සු හිතනවා ඔයා ගිහිල්ල තියෙන්නේ රාජකීය උරුමයක් තියන කැම්පස් එකකට කියල , කොහොමද එතකොට පිලි ගැනීම ..

තරූ : දැන් නම් අයියේ පොඩි කික් එකක් තියෙනවා එහෙම නම් කැම්පස් යන්නම ඕනි ............. 

මම :  කොහොමද තරූ සන් ක්‍රීම් ගාලා kingCountry university එකට යනකොට තියෙන පොෂ් එක ..... 

තරූ  : අනේ මේ මම කිව්වා කියල හිතා ගන්න අයියේ  .......... $%#^&%^$

අපි යුද්දේ කරපු හැටි

                  ඔන්න ඉතින් ඊයේ පෙරේදා දවසක හවස මම ගෙදර ඉස්සර ඉස්තෝප්පුවේ වාඩිවෙලා ඉන්නකොට මට ඇහෙනවා රුපවාහිනියේ කවුදෝ හාදයෙක් අපි යුද්දේ කරපු හැටි කියල හෙන දේශනාවක්දෙනවා.මට හොදටම ෂුවර් මිනිහ යුද්දේ කාලේ අනුරාධපුරෙන් එහාට ගිහිල්ල නැතුව ඇති. ඔන්න ඉතින් ඔය ටික ඔලුවට එනකොට තම මට මතක් උනේ අපි මොනවද යුද්දේ කාලේ කලේ කියල   

අන්තිම ඊළම් යුද්දේ පටන් ගන්නකොට අපි ඉස්කෝලේ උසස්පෙළ පන්තිවල, ටිකෙන් ටික මගේ මතකය ඒ කාලෙට ඇදිල ගියා. යුද්දේ පටන් ගත්තේ සාම්පුර් පොලිස්සියට ගහල මාවිල්ආරු සොරොව්ව වහල, එතකොට අපේ අයට යුද්දේ ගැන ලොකු වැටහීමක් තිබුනේ නැ.කොහොම හරි තොප්පිගලින් යුද්දේ කොටසක් නිමවෙනකොට තමයි අපේ මිනිස්සුන්ට ඒ ගැන පොඩි වැටහීමක් ආවේ, හැබැයි සමහරුන්ට එකත් තිබ්බේ නැ,අපේ යාලුවෙක් ඔන්න පන්තියට ඇවිල්ල කියනවා 

" මචං තොප්පිගල ගේම ඉවරයි යාපනේට තව පොඩ්ඩ දුරක් නේද තියෙන්නේ එකත් ලගදීම ඉවර වෙයි ලු නේ " කියල , ඔන්න අපේ අයගේ දැනුම 

කොහොම හරි ඕක නෙමෙයි මම කියන්න ගියේ 

                                    දැන් ඉතින් මගේ මතකේ ඒ කාලෙට ඇදිල යනවා, හරි ඔය තියෙන්නේ අපි යුද්දේ කාලේ කරපුව කොළඹ අපිට යුද්දේ නොතිබුනාට මේහේ බෝම්ම්බ පිපුරුවනේ , අපේ මිනිස්සු පුරුදු වෙලා හිටියේ බෝම්බයක් පිපුරුනාම කියාද කියල අහන්න ....... කොහොම හරි උදේට බෝම්බයක් පිපුරුනොත් දවල් 12 ට ගෙදර වෙලපහෙන් නිවාඩු, හවස පිපුරුනොත් පහුවෙනිදා නිවාඩු... ගෙදර .......නැත්තම් බෝම්බ ලොරියක් හරි කොළඹ පුපුරුවන්න කොටි අවා කියල දවසම නිවාඩු අපි ඉතින් ගෙදරට වෙලා Breaking නිවුස් බල බල ඉන්නවා , බලන් ගියාම මෙහෙ අය යුද්දේ කාලේ ගෙදරමනේ ඉදල තියෙන්නේ දැන් ඔය කැගැහුවට, 

ඔව් ඉතින් ගෙදර ඉන්නේ නැතිව මොකෝ තුවක්කු අරන් යුද්දෙට යන්නද ?

 අමතක කරන්න නරකයි අපේ වයසේ ගම්වල තරුණ කොල්ලෝ ගොඩක් යුද්දෙට ගියා කියල.

ඇයි එතකොට අපි පූනරීන් ඇල්ලුවම මෙහෙ කොඩි දැම්මේ , අලිමංකඩ ඇල්ලුවම රතිඤ්ඤා දැම්මේ කිලිනොච්චි ඇල්ලුවම කිරිබත් කැපුවේ . ඔය තියෙන්නේ අපි දුන්න සහය. 

( හැබැයි ඔයිට වඩා දෙයක් අපිට කරන්න තිබ්බෙත් නැ ) 

කොහොම හරි මගේ මතකෙට නිකම් වගේ අවා අන්තිමට 18 වෙනිදා රතිඤ්ඤා දාල , පාරපුරා කොඩි අරගෙන දුවල , කිරිබත් හදල කාලා අපි විනෝද උනාට මේ ජයග්‍රහණයට ඇත්තටම දායක වෙලා, අත පය නැතුව මෙහෙ රෝහල් වලට වෙලා හිටපු සෙබලු කී දෙනෙක්ට එදා ඒ කිරිබත් කැල්ලක් දෙන්න අපේ අය කී දෙනෙක්ට මතක් උනාද කියල දැන් ඉතින් ඕව මතක් උනාට වැඩක් නැනේ අතීතෙට යන්න බැනේ. සමහර දේවල් ඔලුවට එන්නේ ටිකක් පහුවෙලා 

රුපවාහිනියේ පොර තාම දේශනාව දෙනවා වැඩේ කරපු හැටි ගැන, හැබැයි අර සොල්දාදුවෝ ගැන වචනයක් වත් නැ. " ඔව් ඉතින් මෙහෙ ඉදන් හුරේ දාපු අපිනේ යුද්දේ කරේ "

තව ලියලා ඉවර නොමැත දෙවියනේ .....

මෙය මිල්ටන් පෙරේරා මහතාගේ ' වැඩකරලා ඉවර නොමැත දෙවියනේ ' 

යන ගීයේ තනුවට  අනුව නිර්මාණය කර ඇත  ............

තව ලියලා ඉවර නොමැත දෙවියනේ

මොකටද මා බ්ලොග් ලියන්න සෙට් උනේ 

කතා ලියලා කොල්ලෝ ඇවිත් බනිනවා 

කෙල්ලෝ ඇවිත්  හිනා වෙවී බලනවා  

දන්නේ කවුද අපේ කතා මං තරම් 

කන්නේ බොන්නේ බ්ලොග් එක ලියනා ගමන් 

පාඩම් කර රෑ 12 ට ලොග් උනා

උදේ අටට විභාගෙකුත් සෙට් උනා 

තව ලියලා ඉවර නොමැත දෙවියනේ ..........//

දින පොතේ වැඩටම මගේ හිත ඇදෙයි 

පාඩම් වැඩට වඩා බ්ලොග් එකට ආදරෙයි  

ඇස් රතු වී ප්‍රතිපල මගේ නිල් වෙලා 

බ්ලොග් කෙරුමේ හැටි දැන් මට තේරුනා 

තව ලියලා ඉවර නොමැත දෙවියනේ .............//

බ්ලොග් කරණයේ දී සිදුවූ ප්‍රයෝගික අත් දැකීම් අලලා රචනය කර ඇත .

මුල් ගීතය ඇසීමට මෙතනින් යන්න ...... Click here ....

නැගිටපල්ලා නැගිටපල්ලා නුබලගේ වාරය ඇවිල්ල ..........

නැගිටපල්ලා නැගිටපල්ලා නුබලගේ වාරය ඇවිල්ල ............

මේ දවස් වල කැම්පස් වල අධ්‍යන කටයුතු කෙරෙන්නේ නැති නිසා ,

ගෙදරට වෙලා ටිකක දවල් වෙනකම් නිදා ගන්න එක තමා කරන්නේ 

" මේකාලේ ලාංකීය තරුණ පරපුර  ටිකක නින්දට බරයිනේ "

කොහොම හරි උදේ පාන්දර නිදාගෙන ඉන්න කොට  ( උදේ කිවුවට 10.00 ට විතර )  

ඔන්න මට නිකම් හිනෙනේ වගේ ඇහෙනවා නැගිටපල්ලා නැගිටපල්ලා කියල .......

 

හරි  ෂුවර් එකටම, කැම්පස් කොල්ලෝ කෙල්ලෝ ලේක්චර්ලගේ සටනට සහය දෙන්න තීරණය කරලා තමා 

දැන් ඉතින් මගේ නින්දට තමා කෙල වෙන්නේ, දැන් ඉතින් කැම්පස් පලයන් කෝ .......හපොයි...... 

හැබැයි දෙගොල්ලෝ එකතුවෙලා ආණ්ඩුවට  ගේමක් දීල සටන දින්නොත් .......  

හපොයි ගෙදර නිදාගන්න තියෙන දවස් ටික තමා නැති වෙන්නේ .......   හැබැයි එක වෙන්න විදිහක් නැ

අපේ කොල්ලෝ කෙල්ලෝ මොකටද ගුරාලගේ සටනට සෙට් වෙන්නේ ....... 

ඇවිල්ල උගන්නන දවසකට , අපි ගිහිල්ල ඉගෙන ගන්නවා ...........

ඔන්න ඔහේ කොට්ටේ බදාගෙන මම තව ටිකක බුදිය ගන්නවා ..........

කොහෙද විනාඩි පහක් වත් නිදාගන්න ලැබුන් නැ අපහු ඔන්න ඇහෙනවා නිකම් හීනෙන් වගේ 

"නැගිටපල්ලා නැගිටපල්ලා නුබලගේ වාරය ඇවිල්ල "  වගේ කවුරු හරි කියනවා 

ෂුවර් එකටම ඔය කියන්නේ නුබලගේ වාරය ඇවිල්ල කියල 

අර ඇමතිතුමා කිව්වේ  කහ චොයිස්  , සුදු චොයිස්  ..........

ඔය ඒක තමා කියන්නේ,  ඇත්තටම අපේ වාරේ ඇවිල්ල නේන්නම් ....

කොට්ටේ බදාගෙන බුදියන් ඉදල හරියන්නේ නැ ...................

රැවුලයි, කොණ්ඩෙයි  වවාගෙන සෙරප්පු දා ගෙන කැම්පස් ගිය කාලෙට ආයුබෝවන් කියන්න ඕනි.

එකත් එකටම  කහ චොයිස්, සුදු චොයිස්  හොයාගන්න  කැම්පස් එන්න ඕනි නැනේ 

ඒවට වෙන වෙන තැන තියනවා නේ .............

ඔන්න ඔහේ තව ටිකක් බුදිය ගන්නවා ............

ඔන්න ඒපාර භුමි කම්පාවක් වගේ මාව හෙල්ලිලා ගිහින් ඇහැරුනා 

අර කට හඩ  ආපහු ඇහෙනවා ............. 

නැගිටපන් කොලුවෝ නැගිටපන්  මේ තේ එක නිමෙනවා  

යසයි වැඩේ 10.00 ත් වෙලා කැම්පස් නැ කියල මෙහෙමත් නිදා ගන්නවද ?

 හපොයි මෙච්චර වෙලා අම්ම නේ කතා කරලා තියෙන්නේ .........

මගේ තේ එක ..............

"නැගිටපන් මිනිහෝ නැගිටපන් නැත්නම්  උබේ තේ එක නිමෙයි" 

මම මටම කියා ගෙන ඇදෙන බැස්ස ........

ආදරේට..............

ආදරේ කරද්දී සමහරු පිස්සු කෙලිනවා, 

ආදරේ ලබාගන්න සමහරු පිස්සු වැඩ කරනවා, 

ආදරය නැවතුනාම සමහරු පිස්සු නටනවා ....

මේක ආදරේ ලබාගන්න බැරුව කොල්ලෙක් කරපු වැඩක් ........ 

වෙලාවට වැඩේ හරිගියේ නැ ..... 

ඔන්න ඉතින් මේ කියන යාළුවා එයාගේ එහා ගෙදර කෙල්ලට ලව් කරා,
කෙල්ල කොහොමහරි කොල්ලට කැමති නැ.

කොල්ල try කරලා try කරලා බැරිම තැන ආදරයේ නාමයෙන් දිවි තොරකර ගන්න හිතල .........

ඔන්න දැන් මිනිහ තීරණ දෙකකට අවා , 

1 වස බීම

2 බෙල්ලේවැල දමා ගැනීම  

කොහොම හරි, වැඩේ හරියටම හරියන්න කියල මිනිහ මේ ක්‍රම දෙකම එකපාර 

ක්‍රියාත්මක කරන්න තීරණය කරලා,

ගෙදරටයි, කෙල්ලටයි ලියුම් දෙකක් ලියල , වැඩේට ලෑස්ති උනාලු 

ගෙදර මේසයක් උඩ නැගලා බාල්කෙට ලනුවක් ගැටගහල බෙල්ලට තොන්ඩුව දා ගෙන  

වහ බෝතලේ බොන ගමන් මේසෙන් පනින්න හිතල , වහ බෝතලේ කටට ලංකරලා 

මෙසේ අයිනට ගිහිලා පනින්න. 

කොහොම හරි මිනිහගේ බරට මෙසේ පැත්තෙන් ඉස්සිලා මිනිහ ලනුවත් කඩාගෙන බිම වැටිලා 

වහ බෝතලේ  කටේ ඇනිලා , වැටුන පාරට  මිනිහගේ අතකුත් කැඩිලා .....

මාසයක් විතර රෝහලේ ආදර සුව වින්දලු.............

පසුව ලියමි ...

මේක මම බ්ලොග් එකේ දාන්න කලින් අපේ කතා නායකයාගේ ගෙදර ගාව ඉන්න 

යාලුවෙක්ට කෝල් එකක් දුන්න පොඩි කරුණු ටිකක මතක් කරගන්න ... 

(මිනිහ තමයි මට ඔය කතාව කිව්වේ )    මිනිහ එපාර මට කියනවා 

අපේ කතා නායකයා මේදවස්වල  අර කෙල්ලගේ නංගිට ලවු කරනවලු ..

ගමේ කට්ටිය ඔක්කොම බලන් ඉන්නේ මේපාර අපේ ප්‍රේම රාජයා  ආදරේට 

කරන්න යන්නේ මොකක්ද කියලලු ............... 

රජ මගුල්

ඔන්න ඉතින් පහුගිය මාසේ එංගලන්තේ රජ ගෙදර , රාජකීය මංගල්‍යය තිබුණනේ එදා ඉතින් අපි කැම්පස් එකට වෙලා ඔය ගැන කතා කර කර ඉන්නකොට අපේ එක යාලුවෙක් මෙහෙම කතාවක් කිව්වා,

ලංකාවේ මිනිස්සු ලැජ්ජා නැතිව දැන් සුද්දගේ රජගෙදර මගුල් බලනවා, අපේ මිනිස්සුන්ට මතක නැ, අපිටත් රජෙක් හිටියා කියල. අපේ රජාට මොකද උණේ?
සුද්දා ඇවිල්ල කිව්වා රජවරු එකාදීපතියෝ, ජනතාවගේ සල්ලි කාබාසිනියා කරනවා,
තව අනන් මනං ගොඩක් කතා කියල, අපේම පිරිසක් එක්ක එකතුවෙලා " කන්ද උඩරට ගිවිසුම " ගහල
අපේ රජාව, රාජකීය පරපුරම පිටුවහල් කරලා මරල දැම්ම
දැන් අපිට රාජකීය උරුමයක්, පෙළපතක් නැ
රාජකීය මගුලුත් නැ.

හැබැයි අරම කියපු සුද්දා උන්ගේ රජ පර පුර තාම රකිනවා, රජ මගුල් ලෝකෙටම පෙන්නනවා
අපේ මිනිස්සුත් කට ඇරගෙන මගුල් බලනවා, නිදහස අරන් 60 ත් පැන්න.
ටිකක හිතල බලන්න වැඩේ කොච්චර සාධාරණද කියල......................

දැන් අපේ යාළුවා දිගටම මෙහෙම කියන් කියන් යනවා, එතකොට තව යාළුවෙක්
" උබට පිස්සුද බන් විකාර ඉතිහයයක් කියන්නේ " කියල ඇහුව ඔන්න එතකොට

අර යාළුවට ටිකක් තරහ ගිහිල්ල මෙහෙම කිව්වා ඔන්න අහගනින් තේරෙන භාෂාවෙන්


මම උබේ ගෙදරට ඇවිල්ල, උබට කියනවා තාත්තල ළමයින්ට අනවශ්‍ය නීති දානවා
තාත්තල ගෙදර ඉන්න එකාධිපතියෝ කියල, උබේ තාත්තාව මරල දානවා ,
ඊට ටික කාලෙකට පස්සේ මම උබලගේ ගෙදර අයට කියනවා ,
දැන් ඇවිල්ල මගේ තාත්තට වැදපන් කියල ..........
ඔන්න ඔය වගේ වැඩක් තමයි සුද්දා අපිට කරේ ....
ඒ පාර නම් කට්ටියටම මිනිහ කිව්වේ මොකක ද කියල තේරුණා

මොනවා උණත් මිනිහ කිව්වා කථාවේ අදටත් ඇත්තක් තියනවා කියල මට හිතෙනවා ...............

නිල් සෙබළිය

ඔන්න ඉතින් මේක උසස් පෙළ කරන කාලේ ( යුද්දේ පටන් ගත්ත කාලේ ) උණ එපා වෙන වැඩක්.....,

අපේ යාළුවෝ ටික උදේ ඉස්කෝලේ ගිහිලා හවස අමතර පන්ති වලින් පස්සේ ( සමහර විට ඊට කලින් ) ඉතින් සුපුරුදු ලෙස මුහුදු වෙරළට යනවා. කොහොම හරි එදා සිකුරාදා හොදටම රෑ වෙනකම් ම කට්ටිය මුහුදේ තමා හිටියේ හිටියේ. ඔන්න රෑ වුණ නිසා මමත් තව තුන් දෙනෙකුත් ලගපාත යාළුවෙක් ගේ ගෙදර යන්න සෙට් උණා.....

දැන් අපි යාලුවගේ ගෙදර යන්න තියන අන්තිම බස් හෝල්ට් එකට අවා.එතකොට වෙලාව 8.00 විතර වෙලා ඇති,මිනිහ ඉන්නේ නෙවි කැම්ප් එකක් තියන හරියේ, කොහොම හරි කැම්ප් එක පහු කරලා තමයි මේ යාලුවගේ ගෙදර යන්න ඕනි. දැන් ඉතින් රෑ හින්ද ඒ පාරේ බස් නැ , අපි පයින්ම ගාටන්න ගත්ත, කැම්ප් එක අයිනෙන්ම තමයි පාර තියෙන්නේ , හැබැයි කැම්ප් එක වටේට අඩි 7 ක් 8 ක් විතර උස තාප්පයක් තියෙනවා ,ඔහොම කැම්ප් එක ලගින් යනකොට එක යළුවෙක්ට පොඩි හදිසි අවශ්‍යතාවයක් ඇති උණා.....අපි කිව්වා ගෙදර යනකම් ඉමු කියල ,

කොහෙද ගමේ ඉන්න යාළුවා කිව්වා...

" මටත් ටැංකිය හිස්කර ගන්න ඕනි පාරේ මොකෙකේ වත් නැ බය වෙන්න එපා මේක අපේ ගම කියල "

දැන් දෙන්නම කැම්ප් එකේ තාප්පේ ළග තිබ්බ ලොකු ගහක් ගාවට ගිහිල්ල කළුවර්ම වැඩේ කරනවා. ඔන්න එතකොට අපිත් එක්ක හිටපු එකෙක් කිව්වා උබලට ලජ්ජා නැද්ද ගම තෙමන්න කියල. එතකොට ගමේ එකා හයියෙන් කෑ ගහල කිව්වා ..........

" යකෝ මේක අපේ ගම අපිට ඕනේ තැන අපි තෙමනව " කියල....ඔන්න එත් එක්කම කවුද කෙල්ලෙක් ගේ සැර කට හඩක් ඇහුණා......." එයි ඔතන කවුද? " කියල.

                        ඔන්න එතකොට තමයි දෙලෝ රත් උණේ , මටත් හිතාගන්න බැ කටහඩ අවේ කොහෙන්ද කියල, එත් එක්කම හෙණ ලයිට් එළියක් නිකම් අහසින් වගේ ගහ ගාවට පාත් උණාඔන්න එතකොට තමයි අපි දැක්කේ ගහට එහා පැත්තෙන් කැම්ප් එක ඇතුළේ උස මුර අට්ටාලයක් තියෙනවා.....

හුටා කළුවරේ කවුද උඩ බලන්නේ අර මුර අට්ටාලේ උඩ නිල් පාට නිල ඇදුම් ඇදගත්ත කාන්තා සෙබලියන් දෙන්නෙක්.වහ කාපිය කිව්වලු , දැන් මොකද කරන්නේ......වෙලාවට අපි තුන් දෙනෙක් පාසල් නිල ඇදුම් ඇදල හිටියේ.....

" මේ මල්ලිලා ඔය වැඩේට ගමේ වෙන තැනක් හොයා ගත්තොත් හොදයි "

දැන් ඉතින් මරු ......අර ගමේ යාළුවා එකපාරටම කලබලේට,

" නෑ සර් ......ආ ... නෑ ....මේ අක්කේ අපි මේ ගෙදර යන ගමන් " කියල යන්තම් කියාගත්ත ........තව පොඩි වචන කිහිපයක් දාල කොහොම හරි යන්තම් එතනින් ලිස්සල අවා. අපිට නම් මැරෙන්න හිනා ............

පස්සේ අපේ ගමේ යාළුවට " නෑ සර් අක්කේ " සහ " නිල් සෙබළිය " කියල නම් කීපයකුත් හැදුනා.......කොහොම හරි පස්සේ තමයි අපි දැන ගත්තේ ඒ හරියේ කැම්ප් එක ඇතුළේ කාන්තා සෙබලියන් ගේ නිල නිවාස තියෙනවා කියල , එකේ මුරට තමයි දෙන්නෙක් ඉදල තියෙන්නේ....

(දින වක වානු හා කාල වෙලාව, නම් ගම් ස්ථාන පිළිබද රහසිගත බව උදෙසා වෙනස්කම් කිහිපයක් කර ඇති බව සලකන්න, මිතුරන් ගේ ගෞරවය උදෙසා )